דברים לב

פְּתִיחַת הַשִּׁירָה
צִדּוּק דִּינֵי ה'
תּוֹכָחָה עַל כְּפִיּוּת טוֹבָה
חַסְדֵי ה' עַל עַמּוֹ
שִׁכְחַת ה', עֲבוֹדָה זָרָה וְעָנְשָׁהּ
רְצוֹן ה' לְהַשְׁמִיד הָעָם לוּלֵא הַגּוֹיִם
חֹסֶר הַהִתְבּוֹנְנוּת בְּעָנְשֵׁי ה'
פֵּרוּט רָעוֹת הָעָם וְנִקְמַת ה' בָּהֶם
אַפְסוּת הָאֱלִילִים
גְּבוּרַת ה' וְנִקְמָתוֹ בַּגּוֹיִם
הַתְרָאַת מֹשֶׁה עַל שְׁמִירַת הַתּוֹרָה
צִוּוּי לְמֹשֶׁה עַל מוֹתוֹ

לשיפור התצוגה

פְּתִיחַת הַשִּׁירָה

א הַאֲזִינוּ הַשָּׁמַיִם וַאֲדַבֵּרָה {ס} וְתִשְׁמַע הָאָרֶץ אִמְרֵי-פִי. {ר}

ב יַעֲרֹף כַּמָּטָר לִקְחִי {ס} תִּזַּל כַּטַּל אִמְרָתִי {ר}

כִּשְׂעִירִם עֲלֵי-דֶשֶׁא {ס} וְכִרְבִיבִים עֲלֵי-עֵשֶׂב. {ר} ג כִּי שֵׁם יְהוָה אֶקְרָא {ס} הָבוּ גֹדֶל לֵאלֹהֵינוּ. {ר}

צִדּוּק דִּינֵי ה'

ד הַצּוּר תָּמִים פָּעֳלוֹ {ס} כִּי כָל-דְּרָכָיו מִשְׁפָּט {ר}

אֵל אֱמוּנָה וְאֵין עָוֶל {ס} צַדִּיק וְיָשָׁר הוּא. {ר} ה שִׁחֵת לוֹ לֹא בָּנָיו מוּמָם {ס} דּוֹר עִקֵּשׁ וּפְתַלְתֹּל. {ר}

תּוֹכָחָה עַל כְּפִיּוּת טוֹבָה

ו הַ לְיְהוָה תִּגְמְלוּ-זֹאת {ס} עַם נָבָל וְלֹא חָכָם {ר}

הֲלוֹא-הוּא אָבִיךָ קָּנֶךָ {ס} הוּא עָשְׂךָ וַיְכֹנְנֶךָ. {ר} ז זְכֹר יְמוֹת עוֹלָם בִּינוּ שְׁנוֹת דֹּר-וָדֹר {ס} שְׁאַל אָבִיךָ וְיַגֵּדְךָ זְקֵנֶיךָ וְיֹאמְרוּ לָךְ. {ר}

ח בְּהַנְחֵל עֶלְיוֹן גּוֹיִם {ס} בְּהַפְרִידוֹ בְּנֵי אָדָם {ר}

יַצֵּב גְּבֻלֹת עַמִּים {ס} לְמִסְפַּר בְּנֵי יִשְׂרָאֵל. {ר} ט כִּי חֵלֶק יְהוָה עַמּוֹ {ס} יַעֲקֹב חֶבֶל נַחֲלָתוֹ. {ר}

חַסְדֵי ה' עַל עַמּוֹ

י יִמְצָאֵהוּ בְּאֶרֶץ מִדְבָּר {ס} וּבְתֹהוּ יְלֵל יְשִׁמֹן {ר}

יְסֹבְבֶנְהוּ יְבוֹנְנֵהוּ {ס} יִצְּרֶנְהוּ כְּאִישׁוֹן עֵינוֹ. {ר} יא כְּנֶשֶׁר יָעִיר קִנּוֹ עַל-גּוֹזָלָיו יְרַחֵף {ס} יִפְרֹשׂ כְּנָפָיו יִקָּחֵהוּ יִשָּׂאֵהוּ עַל-אֶבְרָתוֹ. {ר}

יב יְהוָה בָּדָד יַנְחֶנּוּ {ס} וְאֵין עִמּוֹ אֵל נֵכָר. {ר}

יג יַרְכִּבֵהוּ עַל-במותי (בָּמֳתֵי) אָרֶץ {ס} וַיֹּאכַל תְּנוּבֹת שָׂדָי {ר}

וַיֵּנִקֵהוּ דְבַשׁ מִסֶּלַע {ס} וְשֶׁמֶן מֵחַלְמִישׁ צוּר. {ר} יד חֶמְאַת בָּקָר וַחֲלֵב צֹאן {ס} עִם-חֵלֶב כָּרִים וְאֵילִים {ר}

בְּנֵי-בָשָׁן וְעַתּוּדִים {ס} עִם-חֵלֶב כִּלְיוֹת חִטָּה {ר} וְדַם-עֵנָב תִּשְׁתֶּה-חָמֶר. {ס}

שִׁכְחַת ה', עֲבוֹדָה זָרָה וְעָנְשָׁהּ

טו וַיִּשְׁמַן יְשֻׁרוּן וַיִּבְעָט {ר}

שָׁמַנְתָּ עָבִיתָ כָּשִׂיתָ {ס} וַיִּטֹּשׁ אֱלוֹהַּ עָשָׂהוּ {ר} וַיְנַבֵּל צוּר יְשֻׁעָתוֹ. {ס} טז יַקְנִאֻהוּ בְּזָרִים {ר}

בְּתוֹעֵבֹת יַכְעִיסֻהוּ. {ס} יז יִזְבְּחוּ לַשֵּׁדִים לֹא אֱלֹהַּ {ר}

אֱלֹהִים לֹא יְדָעוּם {ס} חֲדָשִׁים מִקָּרֹב בָּאוּ {ר} לֹא שְׂעָרוּם אֲבֹתֵיכֶם. {ס} יח צוּר יְלָדְךָ תֶּשִׁי {ר}

וַתִּשְׁכַּח אֵל מְחֹלְלֶךָ. {ס} יט וַיַּרְא יְהוָה וַיִּנְאָץ {ר}

מִכַּעַס בָּנָיו וּבְנֹתָיו. {ס} כ וַיֹּאמֶר אַסְתִּירָה פָנַי מֵהֶם {ר}

אֶרְאֶה מָה אַחֲרִיתָם {ס} כִּי דוֹר תַּהְפֻּכֹת הֵמָּה {ר} בָּנִים לֹא-אֵמֻן בָּם. {ס} כא הֵם קִנְאוּנִי בְלֹא-אֵל {ר}

כִּעֲסוּנִי בְּהַבְלֵיהֶם {ס} וַאֲנִי אַקְנִיאֵם בְּלֹא-עָם {ר} בְּגוֹי נָבָל אַכְעִיסֵם. {ס} כב כִּי-אֵשׁ קָדְחָה בְאַפִּי {ר}

וַתִּיקַד עַד-שְׁאוֹל תַּחְתִּית {ס} וַתֹּאכַל אֶרֶץ וִיבֻלָהּ {ר} וַתְּלַהֵט מוֹסְדֵי הָרִים. {ס} כג אַסְפֶּה עָלֵימוֹ רָעוֹת {ר}

חִצַּי אֲכַלֶּה-בָּם. {ס} כד מְזֵי רָעָב וּלְחֻמֵי רֶשֶׁף {ר}

וְקֶטֶב מְרִירִי {ס} וְשֶׁן-בְּהֵמֹת אֲשַׁלַּח-בָּם {ר} עִם-חֲמַת זֹחֲלֵי עָפָר. {ס}

רְצוֹן ה' לְהַשְׁמִיד הָעָם לוּלֵא הַגּוֹיִם

כה מִחוּץ תְּשַׁכֶּל-חֶרֶב וּמֵחֲדָרִים אֵימָה גַּם-בָּחוּר {ר}

גַּם-בְּתוּלָה יוֹנֵק עִם-אִישׁ שֵׂיבָה. {ס} כו אָמַרְתִּי אַפְאֵיהֶם {ר}

אַשְׁבִּיתָה מֵאֱנוֹשׁ זִכְרָם. {ס} כז לוּלֵי כַּעַס אוֹיֵב אָגוּר {ר}

פֶּן-יְנַכְּרוּ צָרֵימוֹ {ס} פֶּן-יֹאמְרוּ יָדֵנוּ רָמָה {ר} וְלֹא יְהוָה פָּעַל כָּל-זֹאת. {ס} כח כִּי-גוֹי אֹבַד עֵצוֹת הֵמָּה {ר}

וְאֵין בָּהֶם תְּבוּנָה. {ס}

חֹסֶר הַהִתְבּוֹנְנוּת בְּעָנְשֵׁי ה'

כט לוּ חָכְמוּ יַשְׂכִּילוּ זֹאת {ר}

יָבִינוּ לְאַחֲרִיתָם. {ס} ל אֵיכָה יִרְדֹּף אֶחָד אֶלֶף {ר}

וּשְׁנַיִם יָנִיסוּ רְבָבָה {ס} אִם-לֹא כִּי-צוּרָם מְכָרָם {ר} וַיהוָה הִסְגִּירָם. {ס} לא כִּי לֹא כְצוּרֵנוּ צוּרָם {ר}

וְאֹיְבֵינוּ פְּלִילִים. {ס}

פֵּרוּט רָעוֹת הָעָם וְנִקְמַת ה' בָּהֶם

לב כִּי-מִגֶּפֶן סְדֹם גַּפְנָם {ר}

וּמִשַּׁדְמֹת עֲמֹרָה {ס} עֲנָבֵמוֹ עִנְּבֵי-רוֹשׁ {ר} אַשְׁכְּלֹת מְרֹרֹת לָמוֹ. {ס} לג חֲמַת תַּנִּינִם יֵינָם {ר}

וְרֹאשׁ פְּתָנִים אַכְזָר. {ס} לד הֲלֹא-הוּא כָּמֻס עִמָּדִי {ר}

חָתוּם בְּאוֹצְרֹתָי. {ס} לה לִי נָקָם וְשִׁלֵּם {ר}

לְעֵת תָּמוּט רַגְלָם {ס} כִּי קָרוֹב יוֹם אֵידָם {ר} וְחָשׁ עֲתִדֹת לָמוֹ. {ס}

אַפְסוּת הָאֱלִילִים

לו כִּי-יָדִין יְהוָה עַמּוֹ {ר}

וְעַל-עֲבָדָיו יִתְנֶחָם {ס} כִּי יִרְאֶה כִּי-אָזְלַת יָד {ר} וְאֶפֶס עָצוּר וְעָזוּב. {ס} לז וְאָמַר אֵי אֱלֹהֵימוֹ {ר}

צוּר חָסָיוּ בוֹ. {ס} לח אֲשֶׁר חֵלֶב זְבָחֵימוֹ יֹאכֵלוּ {ר}

יִשְׁתּוּ יֵין נְסִיכָם {ס} יָקוּמוּ וְיַעְזְרֻכֶם {ר} יְהִי עֲלֵיכֶם סִתְרָה. {ס} לט רְאוּ עַתָּה כִּי אֲנִי אֲנִי הוּא {ר}

וְאֵין אֱלֹהִים עִמָּדִי {ס} אֲנִי אָמִית וַאֲחַיֶּה {ר} מָחַצְתִּי וַאֲנִי אֶרְפָּא {ס} וְאֵין מִיָּדִי מַצִּיל. {ר}

גְּבוּרַת ה' וְנִקְמָתוֹ בַּגּוֹיִם

מ כִּי-אֶשָּׂא אֶל-שָׁמַיִם יָדִי {ס} וְאָמַרְתִּי חַי אָנֹכִי לְעֹלָם. {ר}

מא אִם-שַׁנּוֹתִי בְּרַק חַרְבִּי {ס} וְתֹאחֵז בְּמִשְׁפָּט יָדִי {ר}

אָשִׁיב נָקָם לְצָרָי {ס} וְלִמְשַׂנְאַי אֲשַׁלֵּם. {ר} מב אַשְׁכִּיר חִצַּי מִדָּם {ס} וְחַרְבִּי תֹּאכַל בָּשָׂר {ר}

מִדַּם חָלָל וְשִׁבְיָה {ס} מֵרֹאשׁ פַּרְעוֹת אוֹיֵב. {ר} מג הַרְנִינוּ גוֹיִם עַמּוֹ {ס} כִּי דַם-עֲבָדָיו יִקּוֹם {ר}

וְנָקָם יָשִׁיב לְצָרָיו {ס} וְכִפֶּר אַדְמָתוֹ עַמּוֹ. {ר} {ש}

הַתְרָאַת מֹשֶׁה עַל שְׁמִירַת הַתּוֹרָה

מד וַיָּבֹא מֹשֶׁה וַיְדַבֵּר אֶת-כָּל-דִּבְרֵי הַשִּׁירָה-הַזֹּאת בְּאָזְנֵי הָעָם הוּא וְהוֹשֵׁעַ בִּן-נוּן.

מה וַיְכַל מֹשֶׁה לְדַבֵּר אֶת-כָּל-הַדְּבָרִים הָאֵלֶּה אֶל-כָּל-יִשְׂרָאֵל. מו וַיֹּאמֶר אֲלֵהֶם שִׂימוּ לְבַבְכֶם לְכָל-הַדְּבָרִים אֲשֶׁר אָנֹכִי מֵעִיד בָּכֶם הַיּוֹם אֲשֶׁר תְּצַוֻּם אֶת-בְּנֵיכֶם לִשְׁמֹר לַעֲשׂוֹת אֶת-כָּל-דִּבְרֵי הַתּוֹרָה הַזֹּאת. מז כִּי לֹא-דָבָר רֵק הוּא מִכֶּם כִּי-הוּא חַיֵּיכֶם וּבַדָּבָר הַזֶּה תַּאֲרִיכוּ יָמִים עַל-הָאֲדָמָה אֲשֶׁר אַתֶּם עֹבְרִים אֶת-הַיַּרְדֵּן שָׁמָּה לְרִשְׁתָּהּ. {פ}

צִוּוּי לְמֹשֶׁה עַל מוֹתוֹ

מח וַיְדַבֵּר יְהוָה אֶל-מֹשֶׁה בְּעֶצֶם הַיּוֹם הַזֶּה לֵאמֹר. מט עֲלֵה אֶל-הַר הָעֲבָרִים הַזֶּה הַר-נְבוֹ אֲשֶׁר בְּאֶרֶץ מוֹאָב אֲשֶׁר עַל-פְּנֵי יְרֵחוֹ וּרְאֵה אֶת-אֶרֶץ כְּנַעַן אֲשֶׁר אֲנִי נֹתֵן לִבְנֵי יִשְׂרָאֵל לַאֲחֻזָּה. נ וּמֻת בָּהָר אֲשֶׁר אַתָּה עֹלֶה שָׁמָּה וְהֵאָסֵף אֶל-עַמֶּיךָ כַּאֲשֶׁר-מֵת אַהֲרֹן אָחִיךָ בְּהֹר הָהָר וַיֵּאָסֶף אֶל-עַמָּיו. נא עַל אֲשֶׁר מְעַלְתֶּם בִּי בְּתוֹךְ בְּנֵי יִשְׂרָאֵל בְּמֵי-מְרִיבַת קָדֵשׁ מִדְבַּר-צִן עַל אֲשֶׁר לֹא-קִדַּשְׁתֶּם אוֹתִי בְּתוֹךְ בְּנֵי יִשְׂרָאֵל. נב כִּי מִנֶּגֶד תִּרְאֶה אֶת-הָאָרֶץ וְשָׁמָּה לֹא תָבוֹא אֶל-הָאָרֶץ אֲשֶׁר-אֲנִי נֹתֵן לִבְנֵי יִשְׂרָאֵל. {פ}