תהילים קמג
לשיפור התצוגה 
זְעָקָה לְהוֹשִׁיעוֹ בְּסַכָּנַת אָבְדָן
א מִזְמוֹר לְדָוִדיְהוָה שְׁמַע תְּפִלָּתִי הַאֲזִינָה אֶל-תַּחֲנוּנַיבֶּאֱמֻנָתְךָ עֲנֵנִי בְּצִדְקָתֶךָ. ב וְאַל-תָּבוֹא בְמִשְׁפָּט אֶת-עַבְדֶּךָכִּי לֹא-יִצְדַּק לְפָנֶיךָ כָל-חָי. ג כִּי רָדַף אוֹיֵב נַפְשִׁי דִּכָּא לָאָרֶץ חַיָּתִיהוֹשִׁבַנִי בְמַחֲשַׁכִּים כְּמֵתֵי עוֹלָם. ד וַתִּתְעַטֵּף עָלַי רוּחִי בְּתוֹכִי יִשְׁתּוֹמֵם לִבִּי. ה זָכַרְתִּי יָמִים מִקֶּדֶם הָגִיתִי בְכָל-פָּעֳלֶךָבְּמַעֲשֵׂה יָדֶיךָ אֲשׂוֹחֵחַ. ו פֵּרַשְׂתִּי יָדַי אֵלֶיךָ נַפְשִׁי כְּאֶרֶץ-עֲיֵפָה לְךָ סֶלָה. ז מַהֵר עֲנֵנִי יְהוָה כָּלְתָה רוּחִיאַל-תַּסְתֵּר פָּנֶיךָ מִמֶּנִּי וְנִמְשַׁלְתִּי עִם-יֹרְדֵי בוֹר. ח הַשְׁמִיעֵנִי בַבֹּקֶר חַסְדֶּךָ כִּי-בְךָ בָטָחְתִּיהוֹדִיעֵנִי דֶּרֶךְ-זוּ אֵלֵךְ כִּי-אֵלֶיךָ נָשָׂאתִי נַפְשִׁי. ט הַצִּילֵנִי מֵאֹיְבַי יְהוָה אֵלֶיךָ כִסִּתִי. י לַמְּדֵנִי לַעֲשׂוֹת רְצוֹנֶךָ כִּי-אַתָּה אֱלוֹהָירוּחֲךָ טוֹבָה תַּנְחֵנִי בְּאֶרֶץ מִישׁוֹר. יא לְמַעַן-שִׁמְךָ יְהוָה תְּחַיֵּנִי בְּצִדְקָתְךָ תּוֹצִיא מִצָּרָה נַפְשִׁי. יב וּבְחַסְדְּךָ תַּצְמִית אֹיְבָי וְהַאֲבַדְתָּ כָּל-צֹרְרֵי נַפְשִׁי כִּי אֲנִי עַבְדֶּךָ.
