איוב ט
לשיפור התצוגה 
תֵּאוּר גְּבוּרוֹת ה'
א וַיַּעַן אִיּוֹב וַיֹּאמַר. ב אָמְנָם יָדַעְתִּי כִי-כֵן וּמַה-יִּצְדַּק אֱנוֹשׁ עִם-אֵל. ג אִם-יַחְפֹּץ לָרִיב עִמּוֹ לֹא-יַעֲנֶנּוּ אַחַת מִנִּי-אָלֶף. ד חֲכַם לֵבָב וְאַמִּיץ כֹּחַ מִי-הִקְשָׁה אֵלָיו וַיִּשְׁלָם. ה הַמַּעְתִּיק הָרִים וְלֹא יָדָעוּ אֲשֶׁר הֲפָכָם בְּאַפּוֹ. ו הַמַּרְגִּיז אֶרֶץ מִמְּקוֹמָהּ וְעַמּוּדֶיהָ יִתְפַלָּצוּן. ז הָאֹמֵר לַחֶרֶס וְלֹא יִזְרָח וּבְעַד כּוֹכָבִים יַחְתֹּם. ח נֹטֶה שָׁמַיִם לְבַדּוֹ וְדוֹרֵךְ עַל-בָּמֳתֵי יָם. ט עֹשֶׂה-עָשׁ כְּסִיל וְכִימָה וְחַדְרֵי תֵמָן. י עֹשֶׂה גְדֹלוֹת עַד-אֵין חֵקֶר וְנִפְלָאוֹת עַד-אֵין מִסְפָּר. יא הֵן יַעֲבֹר עָלַי וְלֹא אֶרְאֶה וְיַחֲלֹף וְלֹא-אָבִין לוֹ. יב הֵן יַחְתֹּף מִי יְשִׁיבֶנּוּ מִי-יֹאמַר אֵלָיו מַה-תַּעֲשֶׂה. יג אֱלוֹהַּ לֹא-יָשִׁיב אַפּוֹ תַּחְתָּו שָׁחֲחוּ עֹזְרֵי רָהַב.הַרְגָּשַׁת אַפְסוּתוֹ מוּל ה'
יד אַף כִּי-אָנֹכִי אֶעֱנֶנּוּ אֶבְחֲרָה דְבָרַי עִמּוֹ. טו אֲשֶׁר אִם-צָדַקְתִּי לֹא אֶעֱנֶה לִמְשֹׁפְטִי אֶתְחַנָּן. טז אִם-קָרָאתִי וַיַּעֲנֵנִי לֹא-אַאֲמִין כִּי-יַאֲזִין קוֹלִי. יז אֲשֶׁר-בִּשְׂעָרָה יְשׁוּפֵנִי וְהִרְבָּה פְצָעַי חִנָּם. יח לֹא-יִתְּנֵנִי הָשֵׁב רוּחִי כִּי יַשְׂבִּעַנִי מַמְּרֹרִים. יט אִם-לְכֹחַ אַמִּיץ הִנֵּה וְאִם-לְמִשְׁפָּט מִי יוֹעִידֵנִי. כ אִם-אֶצְדָּק פִּי יַרְשִׁיעֵנִי תָּם-אָנִי וַיַּעְקְשֵׁנִי. כא תָּם-אָנִי לֹא-אֵדַע נַפְשִׁי אֶמְאַס חַיָּי.תְּמִיהָה עַל הַצְלָחַת הָרְשָׁעִים
כב אַחַת הִיא עַל-כֵּן אָמַרְתִּי תָּם וְרָשָׁע הוּא מְכַלֶּה. כג אִם-שׁוֹט יָמִית פִּתְאֹם לְמַסַּת נְקִיִּם יִלְעָג. כד אֶרֶץ נִתְּנָה בְיַד-רָשָׁע פְּנֵי-שֹׁפְטֶיהָ יְכַסֶּהאִם-לֹא אֵפוֹא מִי-הוּא. כה וְיָמַי קַלּוּ מִנִּי-רָץ בָּרְחוּ לֹא-רָאוּ טוֹבָה. כו חָלְפוּ עִם-אֳנִיּוֹת אֵבֶה כְּנֶשֶׁר יָטוּשׂ עֲלֵי-אֹכֶל. כז אִם-אָמְרִי אֶשְׁכְּחָה שִׂיחִי אֶעֶזְבָה פָנַי וְאַבְלִיגָה. כח יָגֹרְתִּי כָל-עַצְּבֹתָי יָדַעְתִּי כִּי-לֹא תְנַקֵּנִי. כט אָנֹכִי אֶרְשָׁע לָמָּה-זֶּה הֶבֶל אִיגָע. ל אִם-הִתְרָחַצְתִּי במו- (בְמֵי-) שָׁלֶג וַהֲזִכּוֹתִי בְּבֹר כַּפָּי. לא אָז בַּשַּׁחַת תִּטְבְּלֵנִי וְתִעֲבוּנִי שַׂלְמוֹתָי.אִי יְכֹלֶת לָדוּן עִם ה'
לב כִּי-לֹא-אִישׁ כָּמוֹנִי אֶעֱנֶנּוּ נָבוֹא יַחְדָּו בַּמִּשְׁפָּט. לג לֹא יֵשׁ-בֵּינֵינוּ מוֹכִיחַ יָשֵׁת יָדוֹ עַל-שְׁנֵינוּ. לד יָסֵר מֵעָלַי שִׁבְטוֹ וְאֵמָתוֹ אַל-תְּבַעֲתַנִּי. לה אֲדַבְּרָה וְלֹא אִירָאֶנּוּ כִּי לֹא-כֵן אָנֹכִי עִמָּדִי.
