איוב לו

לֹא תַמּוּ דְּבָרַי, וְכֻלָּם אֱמֶת

א                   וַיֹּסֶף אֱלִיהוּא וַיֹּאמַר. ב   כַּתַּר-לִי זְעֵיר וַאֲחַוֶּךָּ    כִּי עוֹד לֶאֱלוֹהַּ מִלִּים. ג   אֶשָּׂא דֵעִי לְמֵרָחוֹק    וְלְפֹעֲלִי אֶתֵּן-צֶדֶק. ד   כִּי-אָמְנָם לֹא-שֶׁקֶר מִלָּי    תְּמִים דֵּעוֹת עִמָּךְ.

הַכֹּל יָכוֹל שׁוֹפֵט צֶדֶק

ה   הֶן-אֵל כַּבִּיר וְלֹא יִמְאָס    כַּבִּיר כֹּחַ לֵב. ו   לֹא-יְחַיֶּה רָשָׁע    וּמִשְׁפַּט עֲנִיִּים יִתֵּן. ז   לֹא-יִגְרַע מִצַּדִּיק    עֵינָיווְאֶת-מְלָכִים לַכִּסֵּא    וַיֹּשִׁיבֵם לָנֶצַח וַיִּגְבָּהוּ. ח   וְאִם-אֲסוּרִים בַּזִּקִּים    יִלָּכְדוּן בְּחַבְלֵי-עֹנִי. ט   וַיַּגֵּד לָהֶם פָּעֳלָם    וּפִשְׁעֵיהֶם כִּי יִתְגַּבָּרוּ.

מְיַסֵּר הָרְשָׁעִים לְמַעַן יָשׁוּבוּ

י   וַיִּגֶל אָזְנָם לַמּוּסָר    וַיֹּאמֶר כִּי-יְשׁוּבוּן מֵאָוֶן. יא   אִם-יִשְׁמְעוּ וְיַעֲבֹדוּ    יְכַלּוּ יְמֵיהֶם בַּטּוֹב וּשְׁנֵיהֶם בַּנְּעִימִים. יב   וְאִם-לֹא יִשְׁמְעוּ בְּשֶׁלַח יַעֲבֹרוּ    וְיִגְוְעוּ בִּבְלִי-דָעַת. יג   וְחַנְפֵי-לֵב יָשִׂימוּ אָף    לֹא יְשַׁוְּעוּ כִּי אֲסָרָם. יד   תָּמֹת בַּנֹּעַר נַפְשָׁם    וְחַיָּתָם בַּקְּדֵשִׁים. טו   יְחַלֵּץ עָנִי בְעָנְיוֹ    וְיִגֶל בַּלַּחַץ אָזְנָם.

הַתּוֹעֶלֶת שֶׁבַּיִּסּוּרִים

טז   וְאַף הֲסִיתְךָ מִפִּי-צָר   רַחַב לֹא-מוּצָק תַּחְתֶּיהָוְנַחַת שֻׁלְחָנְךָ    מָלֵא דָשֶׁן. יז   וְדִין-רָשָׁע מָלֵאתָ    דִּין וּמִשְׁפָּט יִתְמֹכוּ. יח   כִּי-חֵמָה פֶּן-יְסִיתְךָ בְסָפֶק    וְרָב-כֹּפֶר אַל-יַטֶּךָּ. יט   הֲיַעֲרֹךְ שׁוּעֲךָ לֹא בְצָר    וְכֹל מַאֲמַצֵּי-כֹחַ. כ   אַל-תִּשְׁאַף הַלָּיְלָה   לַעֲלוֹת עַמִּים תַּחְתָּם. כא   הִשָּׁמֶר אַל-תֵּפֶן אֶל-אָוֶן    כִּי-עַל-זֶה בָּחַרְתָּ מֵעֹנִי.

הִתְבּוֹנְנוּת בִּגְבוּרַת ה'

כב   הֶן-אֵל יַשְׂגִּיב בְּכֹחוֹ    מִי כָמֹהוּ מוֹרֶה. כג   מִי-פָקַד עָלָיו דַּרְכּוֹ    וּמִי-אָמַר פָּעַלְתָּ עַוְלָה. כד   זְכֹר כִּי-תַשְׂגִּיא פָעֳלוֹ   אֲשֶׁר שֹׁרְרוּ אֲנָשִׁים. כה   כָּל-אָדָם חָזוּ-בוֹ    אֱנוֹשׁ יַבִּיט מֵרָחוֹק. כו   הֶן-אֵל שַׂגִּיא וְלֹא נֵדָע    מִסְפַּר שָׁנָיו וְלֹא-חֵקֶר.

נִפְלְאוֹת ה' בִּירִידַת הַגְּשָׁמִים

כז   כִּי יְגָרַע נִטְפֵי-מָיִם    יָזֹקּוּ מָטָר לְאֵדוֹ. כח   אֲשֶׁר-יִזְּלוּ שְׁחָקִים    יִרְעֲפוּ עֲלֵי אָדָם רָב. כט   אַף אִם-יָבִין מִפְרְשֵׂי-עָב    תְּשֻׁאוֹת סֻכָּתוֹ. ל   הֵן-פָּרַשׂ עָלָיו אוֹרוֹ    וְשָׁרְשֵׁי הַיָּם כִּסָּה. לא   כִּי-בָם יָדִין עַמִּים    יִתֶּן-אֹכֶל לְמַכְבִּיר. לב   עַל-כַּפַּיִם כִּסָּה-אוֹר    וַיְצַו עָלֶיהָ בְמַפְגִּיעַ. לג   יַגִּיד עָלָיו רֵעוֹ    מִקְנֶה אַף עַל-עוֹלֶה.