משלי ב

קְרִיאָה לַבֵּן לְהַקְשִׁיב לַחָכְמָה

א   בְּנִי אִם-תִּקַּח אֲמָרָי    וּמִצְו‍ֹתַי תִּצְפֹּן אִתָּךְ. ב   לְהַקְשִׁיב לַחָכְמָה אָזְנֶךָ    תַּטֶּה לִבְּךָ לַתְּבוּנָה. ג   כִּי אִם לַבִּינָה תִקְרָא    לַתְּבוּנָה תִּתֵּן קוֹלֶךָ. ד   אִם-תְּבַקְשֶׁנָּה כַכָּסֶף    וְכַמַּטְמוֹנִים תַּחְפְּשֶׂנָּה.

תּוֹעֶלֶת הַחָכְמָה, יִרְאַת ה' וּשְׁמִירָה מֵרַע

ה   אָז תָּבִין יִרְאַת יְהוָה    וְדַעַת אֱלֹהִים תִּמְצָא. ו   כִּי-יְהוָה יִתֵּן חָכְמָה    מִפִּיו דַּעַת וּתְבוּנָה. ז   וצפן (יִצְפֹּן) לַיְשָׁרִים תּוּשִׁיָּה    מָגֵן לְהֹלְכֵי תֹם. ח   לִנְצֹר אָרְחוֹת מִשְׁפָּט    וְדֶרֶךְ חֲסִידָו יִשְׁמֹר. ט   אָז תָּבִין צֶדֶק וּמִשְׁפָּט    וּמֵישָׁרִים כָּל-מַעְגַּל-טוֹב. י   כִּי-תָבוֹא חָכְמָה בְלִבֶּךָ    וְדַעַת לְנַפְשְׁךָ יִנְעָם. יא   מְזִמָּה תִּשְׁמֹר עָלֶיךָ    תְּבוּנָה תִנְצְרֶכָּה.

הַחָכְמָה - שְׁמִירָה מֵאַנְשֵׁי רַע

יב   לְהַצִּילְךָ מִדֶּרֶךְ רָע    מֵאִישׁ מְדַבֵּר תַּהְפֻּכוֹת. יג   הַעֹזְבִים אָרְחוֹת יֹשֶׁר   לָלֶכֶת בְּדַרְכֵי-חֹשֶׁךְ. יד   הַשְּׂמֵחִים לַעֲשׂוֹת רָע    יָגִילוּ בְּתַהְפֻּכוֹת רָע. טו   אֲשֶׁר אָרְחֹתֵיהֶם עִקְּשִׁים    וּנְלוֹזִים בְּמַעְגְּלוֹתָם.

הַצָּלָה מֵאִשָּׁה רָעָה

טז   לְהַצִּילְךָ מֵאִשָּׁה זָרָה    מִנָּכְרִיָּה אֲמָרֶיהָ הֶחֱלִיקָה. יז   הַעֹזֶבֶת אַלּוּף נְעוּרֶיהָ    וְאֶת-בְּרִית אֱלֹהֶיהָ שָׁכֵחָה. יח   כִּי שָׁחָה אֶל-מָוֶת בֵּיתָהּ    וְאֶל-רְפָאִים מַעְגְּלֹתֶיהָ. יט   כָּל-בָּאֶיהָ לֹא יְשׁוּבוּן    וְלֹא-יַשִּׂיגוּ אָרְחוֹת חַיִּים.

תַּכְלִית הַחָכְמָה

כ   לְמַעַן תֵּלֵךְ בְּדֶרֶךְ טוֹבִים    וְאָרְחוֹת צַדִּיקִים תִּשְׁמֹר. כא   כִּי-יְשָׁרִים יִשְׁכְּנוּ-אָרֶץ    וּתְמִימִים יִוָּתְרוּ בָהּ. כב   וּרְשָׁעִים מֵאֶרֶץ יִכָּרֵתוּ    וּבוֹגְדִים יִסְּחוּ מִמֶּנָּה.