משלי ג

הַבְּרָכָה בִּשְׁמִירַת הַתּוֹרָה וּמִצְווֹתֶיהָ

א   בְּנִי תּוֹרָתִי אַל-תִּשְׁכָּח    וּמִצְו‍ֹתַי יִצֹּר לִבֶּךָ. ב   כִּי אֹרֶךְ יָמִים וּשְׁנוֹת חַיִּים   וְשָׁלוֹם יוֹסִיפוּ לָךְ. ג   חֶסֶד וֶאֱמֶת    אַל-יַעַזְבֻךָקָשְׁרֵם עַל-גַּרְגְּרוֹתֶיךָ    כָּתְבֵם עַל-לוּחַ לִבֶּךָ. ד   וּמְצָא-חֵן וְשֵׂכֶל-טוֹב   בְּעֵינֵי אֱלֹהִים וְאָדָם.

בִּטָּחוֹן בַּה' וּכְבוֹדוֹ

ה   בְּטַח אֶל-יְהוָה בְּכָל-לִבֶּךָ    וְאֶל-בִּינָתְךָ אַל-תִּשָּׁעֵן. ו   בְּכָל-דְּרָכֶיךָ דָעֵהוּ    וְהוּא יְיַשֵּׁר אֹרְחֹתֶיךָ. ז   אַל-תְּהִי חָכָם בְּעֵינֶיךָ    יְרָא אֶת-יְהוָה וְסוּר מֵרָע. ח   רִפְאוּת תְּהִי לְשָׁרֶּךָ    וְשִׁקּוּי לְעַצְמוֹתֶיךָ. ט   כַּבֵּד אֶת-יְהוָה מֵהוֹנֶךָ    וּמֵרֵאשִׁית כָּל-תְּבוּאָתֶךָ. י   וְיִמָּלְאוּ אֲסָמֶיךָ שָׂבָע    וְתִירוֹשׁ יְקָבֶיךָ יִפְרֹצוּ.

שֶׁבַח הַחָכְמָה וְהַתְּבוּנָה וְתוֹעַלְתָּם

יא   מוּסַר יְהוָה בְּנִי אַל-תִּמְאָס    וְאַל-תָּקֹץ בְּתוֹכַחְתּוֹ. יב   כִּי אֶת אֲשֶׁר יֶאֱהַב יְהוָה    יוֹכִיחַוּכְאָב    אֶת-בֵּן יִרְצֶה. יג   אַשְׁרֵי אָדָם מָצָא חָכְמָה    וְאָדָם יָפִיק תְּבוּנָה. יד   כִּי טוֹב סַחְרָהּ מִסְּחַר-כָּסֶף    וּמֵחָרוּץ תְּבוּאָתָהּ. טו   יְקָרָה הִיא מפניים (מִפְּנִינִים)    וְכָל-חֲפָצֶיךָ לֹא יִשְׁווּ-בָהּ. טז   אֹרֶךְ יָמִים בִּימִינָהּ    בִּשְׂמֹאולָהּ עֹשֶׁר וְכָבוֹד. יז   דְּרָכֶיהָ דַרְכֵי-נֹעַם    וְכָל-נְתִיבוֹתֶיהָ שָׁלוֹם. יח   עֵץ-חַיִּים הִיא לַמַּחֲזִיקִים בָּהּ    וְתֹמְכֶיהָ מְאֻשָּׁר.

מַעֲלַת הַחָכְמָה וְהַגְּמוּל לַמַּחֲזִיקִים בָּהּ

יט   יְהוָה בְּחָכְמָה יָסַד-אָרֶץ    כּוֹנֵן שָׁמַיִם בִּתְבוּנָה. כ   בְּדַעְתּוֹ תְּהוֹמוֹת נִבְקָעוּ    וּשְׁחָקִים יִרְעֲפוּ-טָל. כא   בְּנִי אַל-יָלֻזוּ מֵעֵינֶיךָ    נְצֹר תֻּשִׁיָּה וּמְזִמָּה. כב   וְיִהְיוּ חַיִּים לְנַפְשֶׁךָ    וְחֵן לְגַרְגְּרֹתֶיךָ. כג   אָז תֵּלֵךְ לָבֶטַח דַּרְכֶּךָ    וְרַגְלְךָ לֹא תִגּוֹף. כד   אִם-תִּשְׁכַּב לֹא-תִפְחָד    וְשָׁכַבְתָּ וְעָרְבָה שְׁנָתֶךָ. כה   אַל-תִּירָא מִפַּחַד פִּתְאֹם    וּמִשֹּׁאַת רְשָׁעִים כִּי תָבֹא. כו   כִּי-יְהוָה יִהְיֶה בְכִסְלֶךָ    וְשָׁמַר רַגְלְךָ מִלָּכֶד.

אַזְהָרוֹת בָּעִנְיָנִים שֶׁבֵּין אָדָם לַחֲבֵרוֹ

כז   אַל-תִּמְנַע-טוֹב מִבְּעָלָיו   בִּהְיוֹת לְאֵל ידיך (יָדְךָ) לַעֲשׂוֹת. כח   אַל-תֹּאמַר לרעיך (לְרֵעֲךָ) לֵךְ וָשׁוּב וּמָחָר אֶתֵּן    וְיֵשׁ אִתָּךְ. כט   אַל-תַּחֲרֹשׁ עַל-רֵעֲךָ רָעָה    וְהוּא-יוֹשֵׁב לָבֶטַח אִתָּךְ. ל   אַל-תרוב (תָּרִיב) עִם-אָדָם חִנָּם   אִם-לֹא גְמָלְךָ רָעָה.

גְּמוּל הָרְשָׁעִים וּשְׂכַר הַצַּדִּיקִים

לא   אַל-תְּקַנֵּא בְּאִישׁ חָמָס    וְאַל-תִּבְחַר בְּכָל-דְּרָכָיו. לב   כִּי תוֹעֲבַת יְהוָה נָלוֹז    וְאֶת-יְשָׁרִים סוֹדוֹ. לג   מְאֵרַת יְהוָה בְּבֵית רָשָׁע    וּנְוֵה צַדִּיקִים יְבָרֵךְ. לד   אִם-לַלֵּצִים הוּא-יָלִיץ    ולעניים (וְלַעֲנָוִים) יִתֶּן-חֵן. לה   כָּבוֹד חֲכָמִים יִנְחָלוּ    וּכְסִילִים מֵרִים קָלוֹן.