משלי ד

זֵרוּז לְלִמּוּד הַתּוֹרָה

א   שִׁמְעוּ בָנִים מוּסַר אָב    וְהַקְשִׁיבוּ לָדַעַת בִּינָה. ב   כִּי לֶקַח טוֹב נָתַתִּי לָכֶם    תּוֹרָתִי אַל-תַּעֲזֹבוּ. ג   כִּי-בֵן הָיִיתִי לְאָבִי    רַךְ וְיָחִיד לִפְנֵי אִמִּי. ד   וַיֹּרֵנִי וַיֹּאמֶר לִי יִתְמָךְ-דְּבָרַי לִבֶּךָ    שְׁמֹר מִצְו‍ֹתַי וֶחְיֵה. ה   קְנֵה חָכְמָה קְנֵה בִינָה    אַל-תִּשְׁכַּח וְאַל-תֵּט מֵאִמְרֵי-פִי. ו   אַל-תַּעַזְבֶהָ וְתִשְׁמְרֶךָּ    אֱהָבֶהָ וְתִצְּרֶךָּ. ז   רֵאשִׁית חָכְמָה קְנֵה חָכְמָה    וּבְכָל-קִנְיָנְךָ קְנֵה בִינָה. ח   סַלְסְלֶהָ וּתְרוֹמְמֶךָּ    תְּכַבֵּדְךָ כִּי תְחַבְּקֶנָּה. ט   תִּתֵּן לְרֹאשְׁךָ לִוְיַת-חֵן    עֲטֶרֶת תִּפְאֶרֶת תְּמַגְּנֶךָּ.

גְּמוּל הַחָכְמָה לִמְבַקְשֶׁיהָ

י   שְׁמַע בְּנִי וְקַח אֲמָרָי    וְיִרְבּוּ לְךָ שְׁנוֹת חַיִּים. יא   בְּדֶרֶךְ חָכְמָה הֹרֵיתִיךָ    הִדְרַכְתִּיךָ בְּמַעְגְּלֵי-יֹשֶׁר. יב   בְּלֶכְתְּךָ לֹא-יֵצַר צַעֲדֶךָ    וְאִם-תָּרוּץ לֹא תִכָּשֵׁל. יג   הַחֲזֵק בַּמּוּסָר אַל-תֶּרֶף    נִצְּרֶהָ כִּי-הִיא חַיֶּיךָ.

דֶּרֶךְ הָרְשָׁעִים מוּל דֶּרֶךְ הַצַּדִּיקִים

יד   בְּאֹרַח רְשָׁעִים אַל-תָּבֹא    וְאַל-תְּאַשֵּׁר בְּדֶרֶךְ רָעִים. טו   פְּרָעֵהוּ אַל-תַּעֲבָר-בּוֹ    שְׂטֵה מֵעָלָיו וַעֲבֹר. טז   כִּי לֹא יִשְׁנוּ אִם-לֹא יָרֵעוּ    וְנִגְזְלָה שְׁנָתָם אִם-לֹא יכשולו (יַכְשִׁילוּ). יז   כִּי לָחֲמוּ לֶחֶם רֶשַׁע    וְיֵין חֲמָסִים יִשְׁתּוּ. יח   וְאֹרַח צַדִּיקִים כְּאוֹר נֹגַהּ    הוֹלֵךְ וָאוֹר עַד-נְכוֹן הַיּוֹם. יט   דֶּרֶךְ רְשָׁעִים כָּאֲפֵלָה    לֹא יָדְעוּ בַּמֶּה יִכָּשֵׁלוּ.

צִוּוּי לִשְׁמִירַת הַמּוּסָר

כ   בְּנִי לִדְבָרַי הַקְשִׁיבָה    לַאֲמָרַי הַט-אָזְנֶךָ. כא   אַל-יַלִּיזוּ מֵעֵינֶיךָ    שָׁמְרֵם בְּתוֹךְ לְבָבֶךָ. כב   כִּי-חַיִּים הֵם לְמֹצְאֵיהֶם    וּלְכָל-בְּשָׂרוֹ מַרְפֵּא. כג   מִכָּל-מִשְׁמָר נְצֹר לִבֶּךָ    כִּי-מִמֶּנּוּ תּוֹצְאוֹת חַיִּים. כד   הָסֵר מִמְּךָ עִקְּשׁוּת פֶּה    וּלְזוּת שְׂפָתַיִם הַרְחֵק מִמֶּךָּ. כה   עֵינֶיךָ לְנֹכַח יַבִּיטוּ    וְעַפְעַפֶּיךָ יַיְשִׁרוּ נֶגְדֶּךָ. כו   פַּלֵּס מַעְגַּל רַגְלֶךָ    וְכָל-דְּרָכֶיךָ יִכֹּנוּ. כז   אַל-תֵּט-יָמִין וּשְׂמֹאול    הָסֵר רַגְלְךָ מֵרָע.