משלי ו
לשיפור התצוגה 
אַזְהָרָה מִפְּנֵי הָעַרְבוּת
א בְּנִי אִם-עָרַבְתָּ לְרֵעֶךָ תָּקַעְתָּ לַזָּר כַּפֶּיךָ. ב נוֹקַשְׁתָּ בְאִמְרֵי-פִיךָ נִלְכַּדְתָּ בְּאִמְרֵי-פִיךָ. ג עֲשֵׂה זֹאת אֵפוֹא בְּנִי וְהִנָּצֵל כִּי בָאתָ בְכַף-רֵעֶךָלֵךְ הִתְרַפֵּס וּרְהַב רֵעֶיךָ. ד אַל-תִּתֵּן שֵׁנָה לְעֵינֶיךָ וּתְנוּמָה לְעַפְעַפֶּיךָ. ה הִנָּצֵל כִּצְבִי מִיָּד וּכְצִפּוֹר מִיַּד יָקוּשׁ.גְּנוּת הָעַצְלוּת
ו לֵךְ-אֶל-נְמָלָה עָצֵל רְאֵה דְרָכֶיהָ וַחֲכָם. ז אֲשֶׁר אֵין-לָהּ קָצִין שֹׁטֵר וּמֹשֵׁל. ח תָּכִין בַּקַּיִץ לַחְמָהּ אָגְרָה בַקָּצִיר מַאֲכָלָהּ. ט עַד-מָתַי עָצֵל תִּשְׁכָּב מָתַי תָּקוּם מִשְּׁנָתֶךָ. י מְעַט שֵׁנוֹת מְעַט תְּנוּמוֹת מְעַט חִבֻּק יָדַיִם לִשְׁכָּב. יא וּבָא-כִמְהַלֵּךְ רֵאשֶׁךָ וּמַחְסֹרְךָ כְּאִישׁ מָגֵן.גְּנוּת הַבְּלִיַּעַל וְעָנְשׁוֹ
יב אָדָם בְּלִיַּעַל אִישׁ אָוֶן הוֹלֵךְ עִקְּשׁוּת פֶּה. יג קֹרֵץ בְּעֵינָו מֹלֵל בְּרַגְלָו מֹרֶה בְּאֶצְבְּעֹתָיו. יד תַּהְפֻּכוֹת בְּלִבּוֹ חֹרֵשׁ רָע בְּכָל-עֵת מדנים (מִדְיָנִים) יְשַׁלֵּחַ. טו עַל-כֵּן פִּתְאֹם יָבוֹא אֵידוֹ פֶּתַע יִשָּׁבֵר וְאֵין מַרְפֵּא.שִׂנְאַת ה' לְאַנְשֵׁי עָוֶל
טז שֶׁשׁ-הֵנָּה שָׂנֵא יְהוָה וְשֶׁבַע תועבות (תּוֹעֲבַת) נַפְשׁוֹ. יז עֵינַיִם רָמוֹת לְשׁוֹן שָׁקֶר וְיָדַיִם שֹׁפְכוֹת דָּם-נָקִי. יח לֵב חֹרֵשׁ מַחְשְׁבוֹת אָוֶן רַגְלַיִם מְמַהֲרוֹת לָרוּץ לָרָעָה. יט יָפִיחַ כְּזָבִים עֵד שָׁקֶר וּמְשַׁלֵּחַ מְדָנִים בֵּין אַחִים.דְּבֵקוּת בַּתּוֹרָה - הֲגַנָּה מֵאִשָּׁה זָרָה
כ נְצֹר בְּנִי מִצְוַת אָבִיךָ וְאַל-תִּטֹּשׁ תּוֹרַת אִמֶּךָ. כא קָשְׁרֵם עַל-לִבְּךָ תָמִיד עָנְדֵם עַל-גַּרְגְּרֹתֶךָ. כב בְּהִתְהַלֶּכְךָ תַּנְחֶה אֹתָךְ בְּשָׁכְבְּךָ תִּשְׁמֹר עָלֶיךָוַהֲקִיצוֹתָ הִיא תְשִׂיחֶךָ. כג כִּי נֵר מִצְוָה וְתוֹרָה אוֹר וְדֶרֶךְ חַיִּים תּוֹכְחוֹת מוּסָר. כד לִשְׁמָרְךָ מֵאֵשֶׁת רָע מֵחֶלְקַת לָשׁוֹן נָכְרִיָּה. כה אַל-תַּחְמֹד יָפְיָהּ בִּלְבָבֶךָ וְאַל-תִּקָּחֲךָ בְּעַפְעַפֶּיהָ. כו כִּי בְעַד-אִשָּׁה זוֹנָה עַד-כִּכַּר-לָחֶםוְאֵשֶׁת אִישׁ נֶפֶשׁ יְקָרָה תָצוּד.סַכָּנָת הָאִשָּׁה הַזָּרָה
כז הֲיַחְתֶּה אִישׁ אֵשׁ בְּחֵיקוֹ וּבְגָדָיו לֹא תִשָּׂרַפְנָה. כח אִם-יְהַלֵּךְ אִישׁ עַל-הַגֶּחָלִים וְרַגְלָיו לֹא תִכָּוֶינָה. כט כֵּן הַבָּא אֶל-אֵשֶׁת רֵעֵהוּ לֹא-יִנָּקֶה כָּל-הַנֹּגֵעַ בָּהּ. ל לֹא-יָבוּזוּ לַגַּנָּב כִּי יִגְנוֹב לְמַלֵּא נַפְשׁוֹ כִּי יִרְעָב. לא וְנִמְצָא יְשַׁלֵּם שִׁבְעָתָיִם אֶת-כָּל-הוֹן בֵּיתוֹ יִתֵּן. לב נֹאֵף אִשָּׁה חֲסַר-לֵב מַשְׁחִית נַפְשׁוֹ הוּא יַעֲשֶׂנָּה. לג נֶגַע-וְקָלוֹן יִמְצָא וְחֶרְפָּתוֹ לֹא תִמָּחֶה. לד כִּי-קִנְאָה חֲמַת-גָּבֶר וְלֹא-יַחְמוֹל בְּיוֹם נָקָם. לה לֹא-יִשָּׂא פְּנֵי כָל-כֹּפֶר וְלֹא-יֹאבֶה כִּי תַרְבֶּה-שֹׁחַד.
