משלי ז

שְׁמִירַת הַחָכְמָה מֵהָאִשָּׁה הַזָּרָה

א   בְּנִי שְׁמֹר אֲמָרָי    וּמִצְו‍ֹתַי תִּצְפֹּן אִתָּךְ. ב   שְׁמֹר מִצְו‍ֹתַי וֶחְיֵה    וְתוֹרָתִי כְּאִישׁוֹן עֵינֶיךָ. ג   קָשְׁרֵם עַל-אֶצְבְּעֹתֶיךָ    כָּתְבֵם עַל-לוּחַ לִבֶּךָ. ד   אֱמֹר לַחָכְמָה אֲחֹתִי אָתְּ    וּמֹדָע לַבִּינָה תִקְרָא. ה   לִשְׁמָרְךָ מֵאִשָּׁה זָרָה    מִנָּכְרִיָּה אֲמָרֶיהָ הֶחֱלִיקָה.

הַפֶּתִי הַמִּתְקָרֵב לָאִשָּׁה הַזָּרָה

ו   כִּי בְּחַלּוֹן בֵּיתִי   בְּעַד אֶשְׁנַבִּי נִשְׁקָפְתִּי. ז   וָאֵרֶא בַפְּתָאיִם אָבִינָה בַבָּנִים   נַעַר חֲסַר-לֵב. ח   עֹבֵר בַּשּׁוּק אֵצֶל פִּנָּהּ    וְדֶרֶךְ בֵּיתָהּ יִצְעָד. ט   בְּנֶשֶׁף-בְּעֶרֶב יוֹם    בְּאִישׁוֹן לַיְלָה וַאֲפֵלָה. י   וְהִנֵּה אִשָּׁה לִקְרָאתוֹ    שִׁית זוֹנָה וּנְצֻרַת לֵב. יא   הֹמִיָּה הִיא וְסֹרָרֶת    בְּבֵיתָהּ לֹא-יִשְׁכְּנוּ רַגְלֶיהָ. יב   פַּעַם בַּחוּץ פַּעַם בָּרְחֹבוֹת    וְאֵצֶל כָּל-פִּנָּה תֶאֱרֹב.

פִּתּוּיֵי הָאִשָּׁה הַזָּרָה

יג   וְהֶחֱזִיקָה בּוֹ וְנָשְׁקָה לּוֹ    הֵעֵזָה פָנֶיהָ וַתֹּאמַר לוֹ. יד   זִבְחֵי שְׁלָמִים עָלָי    הַיּוֹם שִׁלַּמְתִּי נְדָרָי. טו   עַל-כֵּן יָצָאתִי לִקְרָאתֶךָ    לְשַׁחֵר פָּנֶיךָ וָאֶמְצָאֶךָּ. טז   מַרְבַדִּים רָבַדְתִּי עַרְשִׂי    חֲטֻבוֹת אֵטוּן מִצְרָיִם. יז   נַפְתִּי מִשְׁכָּבִי   מֹר אֲהָלִים וְקִנָּמוֹן. יח   לְכָה נִרְוֶה דֹדִים עַד-הַבֹּקֶר    נִתְעַלְּסָה בָּאֳהָבִים. יט   כִּי אֵין הָאִישׁ בְּבֵיתוֹ    הָלַךְ בְּדֶרֶךְ מֵרָחוֹק. כ   צְרוֹר-הַכֶּסֶף לָקַח בְּיָדוֹ    לְיוֹם הַכֵּסֶא יָבֹא בֵיתוֹ.

לְכִידָתוֹ וְסוֹפוֹ שֶׁל הַפֶּתִי

כא   הִטַּתּוּ בְּרֹב לִקְחָהּ    בְּחֵלֶק שְׂפָתֶיהָ תַּדִּיחֶנּוּ. כב   הוֹלֵךְ אַחֲרֶיהָ פִּתְאֹם    כְּשׁוֹר אֶל-טֶבַח יָבֹא וּכְעֶכֶס אֶל-מוּסַר אֱוִיל. כג   עַד יְפַלַּח חֵץ כְּבֵדוֹ   כְּמַהֵר צִפּוֹר אֶל-פָּחוְלֹא-יָדַע    כִּי-בְנַפְשׁוֹ הוּא.

סִכּוּם הָאַזְהָרָה מִפָּנֶיהָ

כד   וְעַתָּה בָנִים שִׁמְעוּ-לִי    וְהַקְשִׁיבוּ לְאִמְרֵי-פִי. כה   אַל-יֵשְׂטְ אֶל-דְּרָכֶיהָ לִבֶּךָ    אַל-תֵּתַע בִּנְתִיבוֹתֶיהָ. כו   כִּי-רַבִּים חֲלָלִים הִפִּילָה    וַעֲצֻמִים כָּל-הֲרֻגֶיהָ. כז   דַּרְכֵי שְׁאוֹל בֵּיתָהּ    יֹרְדוֹת אֶל-חַדְרֵי-מָוֶת.