משלי כה

כְּבוֹד ה' וּכְבוֹד הַמֶּלֶךְ

א   גַּם-אֵלֶּה מִשְׁלֵי שְׁלֹמֹה   אֲשֶׁר הֶעְתִּיקוּ אַנְשֵׁי חִזְקִיָּה מֶלֶךְ-יְהוּדָה. ב   כְּבֹד אֱלֹהִים הַסְתֵּר דָּבָר    וּכְבֹד מְלָכִים חֲקֹר דָּבָר. ג   שָׁמַיִם לָרוּם וָאָרֶץ לָעֹמֶק    וְלֵב מְלָכִים אֵין חֵקֶר. ד   הָגוֹ סִיגִים מִכָּסֶף    וַיֵּצֵא לַצֹּרֵף כֶּלִי. ה   הָגוֹ רָשָׁע לִפְנֵי-מֶלֶךְ    וְיִכּוֹן בַּצֶּדֶק כִּסְאוֹ.

בִּגְנוּת רְדִיפַת הַכָּבוֹד

ו   אַל-תִּתְהַדַּר לִפְנֵי-מֶלֶךְ    וּבִמְקוֹם גְּדֹלִים אַל-תַּעֲמֹד. ז   כִּי טוֹב אֲמָר-לְךָ עֲלֵה-הֵנָּה    מֵהַשְׁפִּילְךָ לִפְנֵי נָדִיב אֲשֶׁר רָאוּ עֵינֶיךָ.

הִמָּנְעוּת מִמְּרִיבָה וּמִגִּלּוּי סוֹד

ח   אַל-תֵּצֵא לָרִב מַהֵר    פֶּן מַה-תַּעֲשֶׂה בְּאַחֲרִיתָהּ בְּהַכְלִים אֹתְךָ רֵעֶךָ. ט   רִיבְךָ רִיב אֶת-רֵעֶךָ    וְסוֹד אַחֵר אַל-תְּגָל. י   פֶּן-יְחַסֶּדְךָ שֹׁמֵעַ    וְדִבָּתְךָ לֹא תָשׁוּב.

דִּמְיוֹן הַדִּבּוּרִים הַנָּאִים

יא   תַּפּוּחֵי זָהָב בְּמַשְׂכִּיּוֹת כָּסֶף   דָּבָר דָּבֻר עַל-אָפְנָיו. יב   נֶזֶם זָהָב וַחֲלִי-כָתֶם   מוֹכִיחַ חָכָם עַל-אֹזֶן שֹׁמָעַת. יג   כְּצִנַּת שֶׁלֶג בְּיוֹם קָצִיר צִיר נֶאֱמָן לְשֹׁלְחָיו    וְנֶפֶשׁ אֲדֹנָיו יָשִׁיב.

דַּרְכֵי הִתְנַהֲגוּת נְאוֹתִים

יד   נְשִׂיאִים וְרוּחַ וְגֶשֶׁם אָיִן   אִישׁ מִתְהַלֵּל בְּמַתַּת-שָׁקֶר. טו   בְּאֹרֶךְ אַפַּיִם יְפֻתֶּה קָצִין    וְלָשׁוֹן רַכָּה תִּשְׁבָּר-גָּרֶם. טז   דְּבַשׁ מָצָאתָ אֱכֹל דַּיֶּךָּ    פֶּן-תִּשְׂבָּעֶנּוּ וַהֲקֵאתוֹ. יז   הֹקַר רַגְלְךָ מִבֵּית רֵעֶךָ    פֶּן-יִשְׂבָּעֲךָ וּשְׂנֵאֶךָ. יח   מֵפִיץ וְחֶרֶב וְחֵץ שָׁנוּן   אִישׁ עֹנֶה בְרֵעֵהוּ עֵד שָׁקֶר. יט   שֵׁן רֹעָה וְרֶגֶל מוּעָדֶת   מִבְטָח בּוֹגֵד בְּיוֹם צָרָה. כ   מַעֲדֶה-בֶּגֶד בְּיוֹם קָרָה חֹמֶץ עַל-נָתֶר    וְשָׁר בַּשִּׁרִים עַל לֶב-רָע.

נְדִיבוּת תַּחַת נְטִירָה

כא   אִם-רָעֵב שֹׂנַאֲךָ הַאֲכִלֵהוּ לָחֶם    וְאִם-צָמֵא הַשְׁקֵהוּ מָיִם. כב   כִּי גֶחָלִים אַתָּה חֹתֶה עַל-רֹאשׁוֹ    וַיהוָה יְשַׁלֶּם-לָךְ. כג   רוּחַ צָפוֹן תְּחוֹלֵל גָּשֶׁם    וּפָנִים נִזְעָמִים לְשׁוֹן סָתֶר. כד   טוֹב שֶׁבֶת עַל-פִּנַּת-גָּג   מֵאֵשֶׁת מדונים (מִדְיָנִים) וּבֵית חָבֶר. כה   מַיִם קָרִים עַל-נֶפֶשׁ עֲיֵפָה    וּשְׁמוּעָה טוֹבָה מֵאֶרֶץ מֶרְחָק. כו   מַעְיָן נִרְפָּשׂ וּמָקוֹר מָשְׁחָת   צַדִּיק מָט לִפְנֵי-רָשָׁע. כז   אָכֹל דְּבַשׁ הַרְבּוֹת לֹא-טוֹב    וְחֵקֶר כְּבֹדָם כָּבוֹד. כח   עִיר פְּרוּצָה אֵין חוֹמָה   אִישׁ אֲשֶׁר אֵין מַעְצָר לְרוּחוֹ.