נחמיה יא
לשיפור התצוגה 
הַגְדָּלַת הַיִּשּׁוּב בִּירוּשָׁלַיִם
א וַיֵּשְׁבוּ שָׂרֵי-הָעָם בִּירוּשָׁלִָם וּשְׁאָר הָעָם הִפִּילוּ גוֹרָלוֹת לְהָבִיא אֶחָד מִן-הָעֲשָׂרָה לָשֶׁבֶת בִּירוּשָׁלִַם עִיר הַקֹּדֶשׁ וְתֵשַׁע הַיָּדוֹת בֶּעָרִים. ב וַיְבָרְכוּ הָעָם לְכֹל הָאֲנָשִׁים הַמִּתְנַדְּבִים לָשֶׁבֶת בִּירוּשָׁלִָם. {פ}הַיִּשּׁוּב מִבְּנֵי יְהוּדָה
ג וְאֵלֶּה רָאשֵׁי הַמְּדִינָה אֲשֶׁר יָשְׁבוּ בִּירוּשָׁלִָם וּבְעָרֵי יְהוּדָה יָשְׁבוּ אִישׁ בַּאֲחֻזָּתוֹ בְּעָרֵיהֶם יִשְׂרָאֵל הַכֹּהֲנִים וְהַלְוִיִּם וְהַנְּתִינִים וּבְנֵי עַבְדֵי שְׁלֹמֹה. ד וּבִירוּשָׁלִַם יָשְׁבוּ מִבְּנֵי יְהוּדָה וּמִבְּנֵי בִנְיָמִן מִבְּנֵי יְהוּדָה עֲתָיָה בֶן-עֻזִּיָּה בֶּן-זְכַרְיָה בֶן-אֲמַרְיָה בֶּן-שְׁפַטְיָה בֶן-מַהֲלַלְאֵל מִבְּנֵי-פָרֶץ. ה וּמַעֲשֵׂיָה בֶן-בָּרוּךְ בֶּן-כָּל-חֹזֶה בֶּן-חֲזָיָה בֶן-עֲדָיָה בֶן-יוֹיָרִיב בֶּן-זְכַרְיָה בֶּן-הַשִּׁלֹנִי. ו כָּל-בְּנֵי-פֶרֶץ הַיֹּשְׁבִים בִּירוּשָׁלִָם אַרְבַּע מֵאוֹת שִׁשִּׁים וּשְׁמֹנָה אַנְשֵׁי-חָיִל. {ס}הַתּוֹשָׁבִים מִבְּנֵי בִנְיָמִין
ז וְאֵלֶּה בְּנֵי בִנְיָמִן סַלֻּא בֶּן-מְשֻׁלָּם בֶּן-יוֹעֵד בֶּן-פְּדָיָה בֶן-קוֹלָיָה בֶן-מַעֲשֵׂיָה בֶּן-אִיתִיאֵל בֶּן-יְשַׁעְיָה. ח וְאַחֲרָיו גַּבַּי סַלָּי תְּשַׁע מֵאוֹת עֶשְׂרִים וּשְׁמֹנָה. ט וְיוֹאֵל בֶּן-זִכְרִי פָּקִיד עֲלֵיהֶם וִיהוּדָה בֶן-הַסְּנוּאָה עַל-הָעִיר מִשְׁנֶה. {פ}הַתּוֹשָׁבִים מֵהַכֹּהֲנִים
י מִן-הַכֹּהֲנִים יְדַעְיָה בֶן-יוֹיָרִיב יָכִין. יא שְׂרָיָה בֶן-חִלְקִיָּה בֶּן-מְשֻׁלָּם בֶּן-צָדוֹק בֶּן-מְרָיוֹת בֶּן-אֲחִיטוּב נְגִד בֵּית הָאֱלֹהִים. יב וַאֲחֵיהֶם עֹשֵׂה הַמְּלָאכָה לַבַּיִת שְׁמֹנֶה מֵאוֹת עֶשְׂרִים וּשְׁנָיִם וַעֲדָיָה בֶּן-יְרֹחָם בֶּן-פְּלַלְיָה בֶּן-אַמְצִי בֶן-זְכַרְיָה בֶּן-פַּשְׁחוּר בֶּן-מַלְכִּיָּה. יג וְאֶחָיו רָאשִׁים לְאָבוֹת מָאתַיִם אַרְבָּעִים וּשְׁנָיִם וַעֲמַשְׁסַי בֶּן-עֲזַרְאֵל בֶּן-אַחְזַי בֶּן-מְשִׁלֵּמוֹת בֶּן-אִמֵּר. יד וַאֲחֵיהֶם גִּבֹּרֵי חַיִל מֵאָה עֶשְׂרִים וּשְׁמֹנָה וּפָקִיד עֲלֵיהֶם זַבְדִּיאֵל בֶּן-הַגְּדוֹלִים. {ס}הַתּוֹשָׁבִים מֵהַלְוִיִּם וְהַשּׁוֹעֲרִים
טו וּמִן-הַלְוִיִּם שְׁמַעְיָה בֶן-חַשּׁוּב בֶּן-עַזְרִיקָם בֶּן-חֲשַׁבְיָה בֶּן-בּוּנִּי. טז וְשַׁבְּתַי וְיוֹזָבָד עַל-הַמְּלָאכָה הַחִיצֹנָה לְבֵית הָאֱלֹהִים מֵרָאשֵׁי הַלְוִיִּם. יז וּמַתַּנְיָה בֶן-מִיכָא בֶּן-זַבְדִּי בֶן-אָסָף רֹאשׁ הַתְּחִלָּה יְהוֹדֶה לַתְּפִלָּה וּבַקְבֻּקְיָה מִשְׁנֶה מֵאֶחָיו וְעַבְדָּא בֶּן-שַׁמּוּעַ בֶּן-גָּלָל בֶּן-ידיתון (יְדוּתוּן). יח כָּל-הַלְוִיִּם בְּעִיר הַקֹּדֶשׁ מָאתַיִם שְׁמֹנִים וְאַרְבָּעָה. {פ}
יט וְהַשּׁוֹעֲרִים עַקּוּב טַלְמוֹן וַאֲחֵיהֶם הַשֹּׁמְרִים בַּשְּׁעָרִים מֵאָה שִׁבְעִים וּשְׁנָיִם.
הַתּוֹשָׁבִים מִשְּׁאָר יִשְׂרָאֵל וְהַנְּתִינִים
כ וּשְׁאָר יִשְׂרָאֵל הַכֹּהֲנִים הַלְוִיִּם בְּכָל-עָרֵי יְהוּדָה אִישׁ בְּנַחֲלָתוֹ. כא וְהַנְּתִינִים יֹשְׁבִים בָּעֹפֶל וְצִיחָא וְגִשְׁפָּא עַל-הַנְּתִינִים. {פ}הַלְוִיִּם הַיּוֹשְׁבִים בִּירוּשָׁלַיִם
כב וּפְקִיד הַלְוִיִּם בִּירוּשָׁלִַם עֻזִּי בֶן-בָּנִי בֶּן-חֲשַׁבְיָה בֶּן-מַתַּנְיָה בֶּן-מִיכָא מִבְּנֵי אָסָף הַמְשֹׁרְרִים לְנֶגֶד מְלֶאכֶת בֵּית-הָאֱלֹהִים. כג כִּי-מִצְוַת הַמֶּלֶךְ עֲלֵיהֶם וַאֲמָנָה עַל-הַמְשֹׁרְרִים דְּבַר-יוֹם בְּיוֹמוֹ. כד וּפְתַחְיָה בֶן-מְשֵׁיזַבְאֵל מִבְּנֵי-זֶרַח בֶּן-יְהוּדָה לְיַד הַמֶּלֶךְ לְכָל-דָּבָר לָעָם.יִשּׁוּבִים מִבְּנֵי יְהוּדָה מִחוּץ לִירוּשָׁלַיִם
כה וְאֶל-הַחֲצֵרִים בִּשְׂדֹתָם מִבְּנֵי יְהוּדָה יָשְׁבוּ בְּקִרְיַת הָאַרְבַּע וּבְנֹתֶיהָ וּבְדִיבֹן וּבְנֹתֶיהָ וּבִיקַּבְצְאֵל וַחֲצֵרֶיהָ. כו וּבְיֵשׁוּעַ וּבְמֹלָדָה וּבְבֵית פָּלֶט. כז וּבַחֲצַר שׁוּעָל וּבִבְאֵר שֶׁבַע וּבְנֹתֶיהָ. כח וּבְצִקְלַג וּבִמְכֹנָה וּבִבְנֹתֶיהָ. כט וּבְעֵין רִמּוֹן וּבְצָרְעָה וּבְיַרְמוּת. ל זָנֹחַ עֲדֻלָּם וְחַצְרֵיהֶם לָכִישׁ וּשְׂדֹתֶיהָ עֲזֵקָה וּבְנֹתֶיהָ וַיַּחֲנוּ מִבְּאֵר-שֶׁבַע עַד-גֵּיא הִנֹּם.יִשּׁוּבִים מִבְּנֵי בִנְיָמִין מִחוּץ לִירוּשָׁלַיִם
לא וּבְנֵי בִנְיָמִן מִגָּבַע מִכְמָשׂ וְעַיָּה וּבֵית-אֵל וּבְנֹתֶיהָ. לב עֲנָתוֹת נֹב עֲנָנְיָה. לג חָצוֹר רָמָה גִּתָּיִם. לד חָדִיד צְבֹעִים נְבַלָּט. לה לֹד וְאוֹנוֹ גֵּי הַחֲרָשִׁים. לו וּמִן-הַלְוִיִּם מַחְלְקוֹת יְהוּדָה לְבִנְיָמִין. {פ}
