דניאל ז

חֲלוֹם דָּנִיֵּאל עַל אַרְבַּע הַחַיּוֹת

א בִּשְׁנַת חֲדָה לְבֵלְאשַׁצַּר מֶלֶךְ בָּבֶל דָּנִיֵּאל חֵלֶם חֲזָה וְחֶזְוֵי רֵאשֵׁהּ עַל-מִשְׁכְּבֵהּ בֵּאדַיִן חֶלְמָא כְתַב רֵאשׁ מִלִּין אֲמַר.  ב עָנֵה דָנִיֵּאל וְאָמַר חָזֵה הֲוֵית בְּחֶזְוִי עִם-לֵילְיָא וַאֲרוּ אַרְבַּע רוּחֵי שְׁמַיָּא מְגִיחָן לְיַמָּא רַבָּא.  ג וְאַרְבַּע חֵיוָן רַבְרְבָן סָלְקָן מִן-יַמָּא שָׁנְיָן דָּא מִן-דָּא.  ד קַדְמָיְתָא כְאַרְיֵה וְגַפִּין דִּי-נְשַׁר לַהּ חָזֵה הֲוֵית עַד דִּי-מְּרִיטוּ גפיה (גַפַּהּ) וּנְטִילַת מִן-אַרְעָא וְעַל-רַגְלַיִן כֶּאֱנָשׁ הֳקִימַת וּלְבַב אֱנָשׁ יְהִיב לַהּ.  ה וַאֲרוּ חֵיוָה אָחֳרִי תִנְיָנָה דָּמְיָה לְדֹב וְלִשְׂטַר-חַד הֳקִמַת וּתְלָת עִלְעִין בְּפֻמַּהּ בֵּין שניה (שִׁנַּהּ) וְכֵן אָמְרִין לַהּ קוּמִי אֲכֻלִי בְּשַׂר שַׂגִּיא.  ו בָּאתַר דְּנָה חָזֵה הֲוֵית וַאֲרוּ אָחֳרִי כִּנְמַר וְלַהּ גַּפִּין אַרְבַּע דִּי-עוֹף עַל-גביה (גַּבַּהּ) וְאַרְבְּעָה רֵאשִׁין לְחֵיוְתָא וְשָׁלְטָן יְהִיב לַהּ.  ז בָּאתַר דְּנָה חָזֵה הֲוֵית בְּחֶזְוֵי לֵילְיָא וַאֲרוּ חֵיוָה רביעיה (רְבִיעָאָה) דְּחִילָה וְאֵימְתָנִי וְתַקִּיפָא יַתִּירָה וְשִׁנַּיִן דִּי-פַרְזֶל לַהּ רַבְרְבָן אָכְלָה וּמַדֱּקָה וּשְׁאָרָא ברגליה (בְּרַגְלַהּ) רָפְסָה וְהִיא מְשַׁנְּיָה מִן-כָּל-חֵיוָתָא דִּי קדמיה (קָדָמַהּ) וְקַרְנַיִן עֲשַׂר לַהּ.  ח מִשְׂתַּכַּל הֲוֵית בְּקַרְנַיָּא וַאֲלוּ קֶרֶן אָחֳרִי זְעֵירָה סִלְקָת ביניהון (בֵּינֵיהֵן) וּתְלָת מִן-קַרְנַיָּא קַדְמָיָתָא אתעקרו (אֶתְעֲקַרָה) מִן-קדמיה (קֳדָמַהּ) וַאֲלוּ עַיְנִין כְּעַיְנֵי אֲנָשָׁא בְּקַרְנָא-דָא וּפֻם מְמַלִּל רַבְרְבָן. 

מַרְאֵה הַזָּקֵן הַיּוֹשֵׁב עַל כִּסֵּא

ט חָזֵה הֲוֵית עַד דִּי כָרְסָוָן רְמִיו וְעַתִּיק יוֹמִין יְתִב לְבוּשֵׁהּ כִּתְלַג חִוָּר וּשְׂעַר רֵאשֵׁהּ כַּעֲמַר נְקֵא כָּרְסְיֵהּ שְׁבִבִין דִּי-נוּר גַּלְגִּלּוֹהִי נוּר דָּלִק.  י נְהַר דִּי-נוּר נָגֵד וְנָפֵק מִן-קֳדָמוֹהִי אֶלֶף אלפים (אַלְפִין) יְשַׁמְּשׁוּנֵּהּ וְרִבּוֹ רבון (רִבְבָן) קָדָמוֹהִי יְקוּמוּן דִּינָא יְתִב וְסִפְרִין פְּתִיחוּ. 

סוֹף הַחַיּוֹת, הַשְׁמָדָתָן

יא חָזֵה הֲוֵית בֵּאדַיִן מִן-קָל מִלַּיָּא רַבְרְבָתָא דִּי קַרְנָא מְמַלֱּלָה חָזֵה הֲוֵית עַד דִּי קְטִילַת חֵיוְתָא וְהוּבַד גִּשְׁמַהּ וִיהִיבַת לִיקֵדַת אֶשָּׁא.  יב וּשְׁאָר חֵיוָתָא הֶעְדִּיו שָׁלְטָנְהוֹן וְאַרְכָה בְחַיִּין יְהִיבַת לְהוֹן עַד-זְמַן וְעִדָּן. 

חֶזְיוֹן דְּמוּת אָדָם

יג חָזֵה הֲוֵית בְּחֶזְוֵי לֵילְיָא וַאֲרוּ עִם-עֲנָנֵי שְׁמַיָּא כְּבַר אֱנָשׁ אָתֵה הֲוָא וְעַד-עַתִּיק יוֹמַיָּא מְטָה וּקְדָמוֹהִי הַקְרְבוּהִי.  יד וְלֵהּ יְהִב שָׁלְטָן וִיקָר וּמַלְכוּ וְכֹל עַמְמַיָּא אֻמַּיָּא וְלִשָּׁנַיָּא לֵהּ יִפְלְחוּן שָׁלְטָנֵהּ שָׁלְטָן עָלַם דִּי-לָא יֶעְדֵּה וּמַלְכוּתֵהּ דִּי-לָא תִתְחַבַּל.  {פ}

דָּנִיֵּאל מְבַקֵּשׁ פִּתְרוֹן לֶחָזוֹן

טו אֶתְכְּרִיַּת רוּחִי אֲנָה דָנִיֵּאל בְּגוֹ נִדְנֶה וְחֶזְוֵי רֵאשִׁי יְבַהֲלֻנַּנִי.  טז קִרְבֵת עַל-חַד מִן-קָאֲמַיָּא וְיַצִּיבָא אֶבְעֵא-מִנֵּהּ עַל-כָּל-דְּנָה וַאֲמַר-לִי וּפְשַׁר מִלַּיָּא יְהוֹדְעִנַּנִי. 

הַחַיּוֹת הֵן הַמַּלְכֻיּוֹת

יז אִלֵּין חֵיוָתָא רַבְרְבָתָא דִּי אִנִּין אַרְבַּע אַרְבְּעָה מַלְכִין יְקוּמוּן מִן-אַרְעָא.  יח וִיקַבְּלוּן מַלְכוּתָא קַדִּישֵׁי עֶלְיוֹנִין וְיַחְסְנוּן מַלְכוּתָא עַד-עָלְמָא וְעַד עָלַם עָלְמַיָּא. 

אָבְדָנָהּ שֶׁל הַחַיָּה הָרְבִיעִית

יט אֱדַיִן צְבִית לְיַצָּבָא עַל-חֵיוְתָא רְבִיעָיְתָא דִּי-הֲוָת שָׁנְיָה מִן-כלהון (כָּלְּהֵן)  דְּחִילָה יַתִּירָה שניה (שִׁנַּהּ) דִּי-פַרְזֶל וטפריה (וְטִפְרַהּ) דִּי-נְחָשׁ אָכְלָה מַדְּקָה וּשְׁאָרָא ברגליה (בְּרַגְלַהּ) רָפְסָה.  כ וְעַל-קַרְנַיָּא עֲשַׂר דִּי בְרֵאשַׁהּ וְאָחֳרִי דִּי סִלְקַת ונפלו (וּנְפַלָה) מִן-קדמיה (קֳדָמַהּ) תְּלָת וְקַרְנָא דִכֵּן וְעַיְנִין לַהּ וּפֻם מְמַלִּל רַבְרְבָן וְחֶזְוַהּ רַב מִן-חַבְרָתַהּ.  כא חָזֵה הֲוֵית וְקַרְנָא דִכֵּן עָבְדָא קְרָב עִם-קַדִּישִׁין וְיָכְלָה לְהֹן.  כב עַד דִּי-אֲתָה עַתִּיק יוֹמַיָּא וְדִינָא יְהִב לְקַדִּישֵׁי עֶלְיוֹנִין וְזִמְנָא מְטָה וּמַלְכוּתָא הֶחֱסִנוּ קַדִּישִׁין.  כג כֵּן אֲמַר חֵיוְתָא רְבִיעָיְתָא מַלְכוּ רביעיה (רְבִיעָאָה) תֶּהֱוֵא בְאַרְעָא דִּי תִשְׁנֵא מִן-כָּל-מַלְכְוָתָא וְתֵאכֻל כָּל-אַרְעָא וּתְדוּשִׁנַּהּ וְתַדְּקִנַּהּ.  כד וְקַרְנַיָּא עֲשַׂר מִנַּהּ מַלְכוּתָא עַשְׂרָה מַלְכִין יְקֻמוּן וְאָחֳרָן יְקוּם אַחֲרֵיהֹן וְהוּא יִשְׁנֵא מִן-קַדְמָיֵא וּתְלָתָה מַלְכִין יְהַשְׁפִּל.  כה וּמִלִּין לְצַד עליא (עִלָּאָה) יְמַלִּל וּלְקַדִּישֵׁי עֶלְיוֹנִין יְבַלֵּא וְיִסְבַּר לְהַשְׁנָיָה זִמְנִין וְדָת וְיִתְיַהֲבוּן בִּידֵהּ עַד-עִדָּן וְעִדָּנִין וּפְלַג עִדָּן.  כו וְדִינָא יִתִּב וְשָׁלְטָנֵהּ יְהַעְדּוֹן לְהַשְׁמָדָה וּלְהוֹבָדָה עַד-סוֹפָא. 

הַמַּלְכוּת שֶׁתִּהְיֶה לְעַם הַקֹּדֶשׁ

כז וּמַלְכוּתָא וְשָׁלְטָנָא וּרְבוּתָא דִּי מַלְכְוָת תְּחוֹת כָּל-שְׁמַיָּא יְהִיבַת לְעַם קַדִּישֵׁי עֶלְיוֹנִין מַלְכוּתֵהּ מַלְכוּת עָלַם וְכֹל שָׁלְטָנַיָּא לֵהּ יִפְלְחוּן וְיִשְׁתַּמְּעוּן.  כח עַד-כָּה סוֹפָא דִי-מִלְּתָא אֲנָה דָנִיֵּאל שַׂגִּיא רַעְיוֹנַי יְבַהֲלֻנַּנִי וְזִיוַי יִשְׁתַּנּוֹן עֲלַי וּמִלְּתָא בְּלִבִּי נִטְרֵת.  {פ}